دنيا الوله

دنيا الوله
خل ٍ سلى وخل ٍ دله
احد ٍ تناساه الغرام
او هو تناسى صحبته
وفي شفته
حارت مشاوير الكلام
وأمسى يحسبنه وصل
وتو الطريق بأوله
***
دنيا الوله
اشوفها في نظرته
في بسمته
في همسته
في كل ذكرى تحتوي
اجمل معالم صورته
اشوفها
واصرخ قهر
واعانق عيون السهر
لين اختنق
والفكر يجمع صورته
ويرحل على موج البحر
ويترك بقايا هالجسد
ويبقى الجسد
مثل الورق
اليا تناثر واحترق
يطير من نسمة هواء
***
دنيا الوله
هي دنيتي
هي دنيتك
هي دنيت القلب العطيب
الي تهاوى وأتعبك
وان كان قلبك عذبك
ماعذبه غيرك احد
ماعذبه غير الوعد
الي سلى به خاطرك
وأبطى يخايل ناظرك
وخاب الوعد
وخيب امل قلبك بعد
لو تقترب مالك امل
ولو تبتعد مالك امل
ولا لي امل مثلك انا
مثلك تعذبت وشقيت
مثلك تحملت ونسيت
مثلك اترجم عبرتي
على الورق
الي من النشوه غرق
بحبر القلم
هاك القلم
الي يحركه الألم
لامن رحل فكري جنوب
لاصار شتات الهبوب
لجل الغلا
لجل العهد
***
الله ياوقت ٍ مضى
لو هو يعود
ليته يعود
وعين ٍ تمنت شوف عين
لو من بعيد
لو هي من النظره تزيد
هم وعذاب
ووقت القاء تحسب حساب للغياب
وتزيد نظرات العيون في كل شي
حتى الزمان
حتى المكان
الي جمع نبض القلوب
حتى الشجر
يلقى مكانه بالنظر
حتى الورود
واليا حوتني نظرته
حلق بها فكري وصال
واستسلم لريح الخيال
وراحو بعيد
حد السماء
حد السحاب اليا ضما
لين اختفو
راحو بعيـــد
وخلو خفوقي يحترق
ينزف جروحه من جديد
وتصرخ به حلوف ووعود
لاتحترق
وتفقد شعورك بالحياه
لاتحترق
ويجتاحك الهم الكئيب
ولا له دواء
غير انك تشوف الحبيب
وتصرخ دخيلك يازمن
كيف استريح
دام الشقاء صعب
ودام القاء صعب
ودام البعد صعب
وأصعب من الصعب
كيف استريح ؟!

***
ياحب يكفيني هموم
خضت الصحاري والسموم
في سكتك
في دربك الي مايجير
ووقت الضما كله سراب
كله هجير
لكن ابصبر واحتمل
لو هو يصير الي يصير
ابحتمل
بمشي على قول المثل
من سار على الدرب وصل
وابوصله
لوني جريح
لوني من جروحي اطيح
ابوصله
***
متى على الله نلتقي
متى ياشمسي تشرقي
متى تحقق ياوعد
وتحضن يدينه في يدي
اوااااه ياقلب الشقا
صوته غدى ون وفحيح
مسكين اتعبه الضما
لامن مشى لازم يطيح
ماله امل غير السما
غير المطر
ماله امل
حتى الوصاه
ماله امل يكتب وصاه
الا على خد الرمل
ولا له امل
مدام همسات الرياح
تمسح معالم ماكتب

دمتم بود